Məlumata görə, pilotsuz uçuş aparatları (PUA) istehsal edən zavodu yandırmağa hazırlaşmaqda şübhəli bilinən iki xarici vətəndaş saxlanılıb. Üçüncü şübhəli isə Almaniya ərazisində tutulub. Onların hər üçünə artıq ittiham irəli sürülüb.

Hadisə Slovakiyanın şərqində, zavodun yerləşdiyi ərazidə baş verib.

İstintaqın məlumatına görə, şübhəlilər zavodu yandırmağı planlaşdırıblar. Lakin Mütəşəkkil Cinayətkarlıqla Mübarizə İdarəsinin xüsusi təyinatlı əməkdaşlarının müdaxiləsi cinayətin hazırlıq mərhələsində qarşısının alınmasına imkan verib.

Polis nümayəndələri şübhəlilərin Slovakiya və Almaniyada eyni vaxtda saxlanıldığını bildiriblər. Saxlanılan şəxslərin kimliyi hələlik açıqlanmayıb. Məlumata görə, onların heç biri Slovakiya vətəndaşı deyil.

İstintaq orqanları terror aktı və diversiya hazırlığı faktı ilə bağlı cinayət işi açıblar. Hazırda cinayətin mümkün sifarişçiləri və motivləri müəyyənləşdirilir.