Bunu Azərbaycan Ürək-Damar Cərrahiyyəsi Cəmiyyətinin fəxri sədri, məşhur ürək cərrahı Kamran Musayev deyib.
Onun sözlərinə görə, cəmiyyət bu məsələ ilə bağlı daha çox məlumatlandırılmalıdır:
“Çünki xüsusilə tanınmış insanların gənc yaşda infarkt nəticəsində həyatını itirməsi insanlarda ciddi narahatlıq doğurur. Bu, eyni zamanda, reallığı da ortaya qoyur: gənc yaşda infarkt keçirən və bunun nəticəsində həyatını itirən insanların sayı artır.
Bu gün ürək transplantasiyası üçün gözləmə siyahısında 50-dən çox xəstə var. Onların arasında 40 yaş və daha aşağı yaşda olan, 2 dəfə infarkt keçirmiş və ürək transplantasiyasına ehtiyacı olan xəstələr də mövcuddur.
Həmin xəstələr infarkt keçirmələrinə baxmayaraq, həyatlarını itirməyiblər. Lakin infarkt nəticəsində ürəyin fəaliyyəti ciddi şəkildə zəifləyib. Elə xəstələrimiz var ki, onların ürəyinin gücü 5, 10 və ya 15 faizə qədər düşüb. Belə xəstələrin 40 yaş və daha aşağı yaşda olması xüsusilə diqqətçəkəndir”.
