Son günlər Mingəçevirdə məişət tullantılarının vaxtında yığılmaması ilə bağlı vətəndaşların sosial şəbəkələrdə paylaşdığı narazılıqlar şəhərin gündəmini zəbt edib. Lakin məsələ ilə bağlı aparılan monitorinq ortaya başqa bir mənzərə çıxarıb: zibil qablarının ətrafındakı tullantıların heç də hamısının adi məişət zibilləri olmadığı bildirilir.
Mingəçevir Şəhər İcra Hakimiyyətinin başçısı İlham İsmayılovun tapşırığı ilə şəhərdə vəziyyətlə bağlı monitorinq keçirilib. Monitorinq zamanı müəyyən edildiyi bildirilir ki, tullantı qablarının ətrafına atılan zibillərin böyük hissəsini evlərdə aparılan təmir işlərindən yaranan tullantılar, eləcə də yaşayış obyektləri, kafelər, restoranlar və müxtəlif xidmət sahələrinin iri həcmli tullantıları təşkil edir.
Yəni məsələ təkcə “zibil niyə vaxtında yığılmır?” sualından ibarət deyil.
Əsas sual budur: iri həcmli tikinti və obyekt tullantılarını kim və niyə məişət tullantıları üçün nəzərdə tutulan qablara daşıyır?
Təbii ki, böyük həcmli tullantıların standart zibil qablarına sığmaması onların qabların ətrafına qalaqlanmasına gətirib çıxarır. Nəticədə isə küçələrdə xoşagəlməz mənzərə, antisanitar vəziyyət və şəhərin ümumi görünüşünə xələl gətirən görüntü yaranır.
Məsələ ilə bağlı Mingəçevər şəhərində yerləşən Mənzil İstismar Sahələrinin rəhbərlərinin iştirakı ilə toplantı keçirilib. İclasda əsas diqqət məişət tullantılarından kənar tullantıların yaşayış məntəqələrindəki tullantı qablarının ətrafına atılması probleminə yönəlib.
İcra hakimiyyətinin nümayəndəsi Elşən Əliyev bildirib ki, şəhərdə bu istiqamətdə nəzarət daha da gücləndiriləcək. Xüsusi texniki vasitələrdən, o cümlədən kamera görüntülərindən istifadə etməklə tullantıları qanunsuz şəkildə zibil qablarının ətrafına atan şəxslərin müəyyənləşdirilməsi nəzərdə tutulur.
Belə şəxslərin inzibati məsuliyyətə cəlb olunacağı və 200 manatdan 300 manatadək cərimə ilə üzləşə biləcəyi bildirilib.
Zibil qabı “tikinti sahəsi” deyil!
Burada bir məsələni açıq demək lazımdır: zibil qabının yanına divar söküntüsü, tikinti qalıqları, iri həcmli məişət əşyaları və obyekt tullantıları töküb sonra “zibil niyə yığılmır?” deyə şikayət etmək heç də ədalətli yanaşma deyil.
Şəhərin təmizliyi yalnız kommunal xidmətlərin işi deyil. Şəhəri zibilləyən şəxsin də məsuliyyəti var.
Əgər bir obyekt sahibi və ya evində təmir aparan şəxs öz tullantısını adi məişət zibili ilə eyniləşdirib küçədəki konteynerin yanına atırsa, nəticədə həmin tullantının yaratdığı antisanitar vəziyyətin məsuliyyətini də yalnız kommunal xidmətin üzərinə qoymaq olmaz.
Amma digər tərəfdən, vətəndaşın şikayəti də avtomatik olaraq əsassız sayıla bilməz. Tullantıların vaxtında və düzgün yığılması, konteynerlərin sayının və yerləşdirilməsinin ehtiyaca uyğun olması da aidiyyəti qurumların məsuliyyətidir.
Ona görə də bu məsələdə həm tullantını atan, həm də tullantının idarə olunmasına cavabdeh olan tərəf öz məsuliyyətini yerinə yetirməlidir.
Mingəçevirin küçələri heç kimin şəxsi tullantı meydançası deyil.
Kamera nəzarətinin tətbiqi və qaydaları pozanların cərimələnməsi isə ən azı problemin bir tərəfinə — zibili haraya gəldi atanların məsuliyyətinə — ciddi yanaşmanın başlanğıcı ola bilər.
İndi əsas məsələ odur ki, bu nəzarət yalnız bir neçə gün davam edən kampaniyaya çevrilməsin. Çünki şəhərin təmizliyi kamera qarşısında deyil, hər gün və hər küçədə təmin edilməlidir.
