Bunu Milli Məclisin Səhiyyə komitəsinin sədri, akademik Əhliman Əmiraslanov parlamentin Təbii ehtiyatlar, energetika və ekologiya, Əmək və sosial siyasət, Səhiyyə, Beynəlxalq münasibətlər və parlamentlərarası əlaqələr komitələrinin birgə iclasında 2027-ci il dövlət büdcəsi layihəsinin müzakirəsi zamanı deyib.
O qeyd edib ki, bu proqramlar səhiyyənin kifayət qədər ağır sahələrini əhatə edir.
“Təqdirəlayiq haldır ki, növbəti ildə böyük oynaqların transplantasiyasına qoyulmuş limitin ləğvi və süni ilik transplantasiyası limitinin 20-dən 50-yə qaldırılması nəzərdə tutulur. Növbəti ildən çox az sayda səhiyyə üzrə dövlət proqramları qalacaq ki, onlar icbari tibbi sığorta ilə əhatə olunmasın. Onlardan biri onkologiya proqramıdır. Mən istərdim qeyd edim ki, əhali arasında ən çox tələfat verən iki patologiyadan biri olan onkoloji xəstəliklərin də icbari tibbi sığorta ilə qarşılanması son dərəcə vacibdir”.
Ə.Əmiraslanov vurğulayıb ki, icbari tibbi sığortanın sayəsində uğurlar əldə olması ilə bərabər əhalinin icbari tibbi sığortadan gözləntiləri də kifayət qədər çoxdur:
“Onların hamısını sadalamaq çətindir, bir neçəsini istərdim ki, bugünkü toplantıda nazirlərimizin iştirak etməsindən istifadə edərək onların nəzərinə çatdırım. Onlardan biri xəstələrin ambulator müalicə alan xəstələrin dərman vəsaitləri ilə təminatının icbari tibbi sığorta ilə qarşılanması məsələsidir. Bu barədə biz çox danışmışıq, həm Milli Məclisdəki tədbirlərdə, həm büdcə müzakirəsində, hökumətin hesabatında, ancaq təəssüflər olsun ki, bu günə qədər əhalinin səbirsizliklə gözlədiyi bu problemlər öz həllini tapmayıbdır. Əminliklə demək olar ki, belə böyük bir büdcə ilə növbəti ildə bu məsələ öz müsbət həllini tapacaqdır.
İnsanlarımızı narahat edən digər bir məsələ əhaliyə göstərilən ilkin tibbi xidmətin səviyyəsinin aşağı olmasıdır. Bu xüsusilə bölgələrdə özünü qabarıq göstərir. Kəndlərimizdə olan ilkin tibbi xidmət məntəqələrinin əksəriyyəti yararsız vəziyyətdədir. Kadr çatışmazlığı mövcuddur.
Əminliklə demək olar ki, ölkəmizin birinci vitse-prezidenti Mehriban xanım Əliyevanın təşəbbüsü və möhtərəm cənab Prezidentimiz İlham Əliyevin dəstəyi ilə böyük bir qrup tibb işçilərinin əmək haqlarının təsirli dərəcədə artırılması, xüsusilə bölgələrdə çalışan tibb işçilərinin kadr problemlərinin həllinə müsbət təsir edəcək.
Ancaq gözləmədən bölgələrdə xüsusilə ilkin tibbi xidmət müəssisələrinin bərpasına başlamaq lazımdır. Bilirsiniz ki, son iki ildə artıq ürək transplantasiyası əməliyyatlarının həyata keçirilməsi başlayıb. Bu Cənubi Qafqazda ilk dəfə olaraq bizim ölkəmizdə həyata keçirilir və nəticələr uğurludur. Bu əməliyyatlar son dərəcə də böyük maliyyə tutumlu əməliyyatlardır və növbəti ildən bu əməliyyatların da icbari tibbi sığorta ilə qarşılanmasına ehtiyac duyulur.
Daha bir məsələ, müasir təbabəti, xüsusilə təbabətin cərrahiyyə sahəsini robot texnikasız təsəvvür eləmək mümkün deyil. Robot cərrahiyyəsinin köməyi ilə ən mürəkkəb müalicə və müayinələr həyata keçirmək mümkündür. Ölkəmizdə də belə robot cərrahiyyə bölmələrinin yaradılmasına gələcəkdə vəsait ayrılması son dərəcə vacib olar”.
