Bunu açıqlamasında politoloq Samir Hümbətov deyib.
Onun sözlərinə görə, BMT, ATƏT, digər Qərb təsisatları və dünyanın müxtəlif qurumları 30 il ərzində Azərbaycan torpaqlarının Ermənistanın işğalından azad olunması üçün heç bir ciddi addım atmayıblar:
“Onlar hər zaman gözləmə mövqeyində olublar, praktik addım atmayıblar. Sonda yenə məsələni özümüz həll etdik. Yəni biz Ermənistanın da, erməni xalqının da hansı xislətdə olduğunu yaxşı bilirik. Düzdür, bugün artıq 8 avqust anlaşmasından sonra münasibətləri yeni mərhələyə keçirməyə çalışırıq. Amma hələ bunun riskləri yenə də qalmaqdadır. Nəticə nə olacaq? Bu, qarşıdakı dövrdə bilinəcək. Çünki Ermənistana tam güvənmək olmur.
Təbii ki, biz istəyirik ki, regionumuza sülh gəlsin, amma bu, təkcə bizim istəyimizə də bağlı deyil. Bəs Ermənistan, erməni xalqı və beynəlxalq təşkilatlar bunu istəyirmi? Məsələ bundan ibarətdir”.
Politoloq onu da qeyd edib ki, dünyanın əsas gücləri hər zaman münaqişənin olmasını və bundan istifadə edib münaqişə tərəflərini öz təsir altında saxlamağa çalışırlar:
“Ermənistan təkcə Xocalıda soyqırım törətməyib. Ballıqayada, Kəlbəcərin tunel ərazisində və digər yerlərdə azərbaycanlılara qarşı qırğın və vəhşilik törədilib. Bunların hər birinin arxasında beynəlxalq təşkilatların məsuliyyətsizliyi, cinayətlərə göz yumması dayanır. Biz bu gün bunun dəyişəcəyinə dair bir əsas da görmürük.
Düzdür, biz artıq ərazi bütövlüyümüzü və suverenliyimizi tam bərpa etmişik. Artıq biz öz ərazilərimizə sahib dururuq. Amma hələ bu, son deyil. Qarşıdakı dövrdə biz həm də yekun sülh müqaviləsi imzalanmalıyıq.
Yəni Qərb təsisatları sülhü dəstəklədiklərini sözdə deyə bilərlər, amma əməldə həqiqətən sülhü dəstəkləyirlərmi? İstəyirlərmi bunu? Bunun özü belə, açıq sual olaraq qalmaqdadır”.
