Hücumların əsas hədəflərindən biri paytaxt Kiyev olub.
Şəhər yeddi dalğa ballistik raket zərbəsinə məruz qalıb, bir sıra ərazilərdə yanğınlar baş verib, mühüm nəqliyyat infrastrukturu zədələnib.
Kiyevin meri Vitali Kliçko paytaxtdakı üç körpünün – Podilsko-Voskresenski, Darnitski və Cənub körpüsünün raket hücumları nəticəsində zərər gördüyünü açıqlayıb.
Onun sözlərinə görə, Podilsko-Voskresenski körpüsündə sağ sahildən sol sahilə doğru nəqliyyatın hərəkəti tamamilə dayandırılıb. Darnitski körpüsünə dəyən ziyanın miqyası isə hava hücumu təhlükəsi başa çatdıqdan sonra mütəxəssislər tərəfindən qiymətləndiriləcək. Cənub körpüsündə də hərəkətə məhdudiyyətlər tətbiq olunub. Hazırda yalnız müəyyən çəki həddinə uyğun nəqliyyat vasitələrinin keçidinə icazə verilir.
V.Kliçko paytaxt sakinlərini zərurət olmadıqda şəxsi avtomobillərdən istifadə etməməyə çağırıb. O, həmçinin müəssisə və təşkilatlara əməkdaşların məsafədən iş rejiminə keçirilməsini tövsiyə edib.
Kiyev Şəhər Hərbi Administrasiyasının məlumatına görə, Rusiyanın hücumu nəticəsində paytaxtda 3 nəfər ölüb, 2 nəfər isə yaralanıb.
Kiyev meri V.Kliçkonun sözlərinə görə, ölənlər “Kiyevvodokanal”ın işçiləri olub. O, həmçinin təxminən 15 nəfərin yaralandığını bildirib.
Hücumlar nəticəsində Kiyevin Obolonski və Qoloseyevski rayonlarında yanğınlar qeydə alınıb. Elektrik enerjisinin verilməsində yaranan problemlər səbəbindən Peçerski, Solomyanski və Qoloseyevski rayonlarının bəzi hissələrində trolleybusların hərəkəti müvəqqəti dayandırılıb. Bir sıra avtobus marşrutlarının istiqaməti də dəyişdirilib.
Rusiya ordusu Xarkov şəhərini də hədəfə alıb. Şəhərin Şevçenkivski rayonunda tibb müəssisəsinə PUA ilə endirilən zərbə nəticəsində dörd nəfər yaralanıb. Bundan başqa, yaşayış kompleksinə edilən hücum yanğına səbəb olub. Gecə həmçinin Lvov şəhərində də partlayış səsləri eşidilib.
Rusiyanın kütləvi hücumu nəticəsində Ukraynanın başqa bir neçə böyük şəhərində mülki infrastruktura, nəqliyyat sisteminə və yaşayış obyektlərinə ciddi ziyan vurub.