Mingəçevir şəhər İcra Hakimiyyətinin başçısı İlham İsmayılovun vətəndaşlarla növbəti səyyar görüşü keçirilib.
Görüş şəhərin Xətai 10 ünvanında yerləşən binanın sakinləri ilə baş tutub. Binanın qarşısında keçirilən görüşdə İcra Hakimiyyəti başçısı aparatının məsul əməkdaşları, hüquq-mühafizə orqanlarının rəhbərləri, şəhər Bələdiyyəsinin sədri, idarə və müəssisə rəhbərləri, sakinlər və media nümayəndələri iştirak ediblər.
Görüşü açan İlham İsmayılov ölkə Prezidentinin tapşırığına uyğun olaraq vətəndaşların rifah halının yaxşılaşdırılması və qarşılaşdıqları problemlərin yerindəcə öyrənilərək həllinə nail olunması məqsədilə müxtəlif ərazilərdə səyyar görüşlərin keçirilməsinin əhəmiyyətini vurğulayıb.
Şəhər rəhbəri avqustun 23-25-də Azərbaycan Respublikasının Prezidenti İlham Əliyevin rəhbərliyi ilə Özbəkistan Respublikasına baş tutan səfər barədə də fikirlərini bölüşüb. Nümayəndə heyətinin tərkibində səfərdə iştirak etməsindən məmnunluğunu ifadə edən İ.İsmayılov keçirilən forumu, iqtisadi əməkdaşlıq və dostluq müqavilələrinin imzalanmasını, həmçinin Azərbaycan Prezidentinin şərəfinə təşkil olunan tədbirləri ölkəmizin beynəlxalq nüfuzunun və əlaqələrinin daha da güclənməsinin göstəricisi kimi qiymətləndirib.
İlham İsmayılov Mingəçevir üçün səfər çərçivəsində baş verən mühüm hadisələrdən birinə də diqqət çəkib. Belə ki, şəhərdə yeni tekstil fabrikinin tikintisinin reallaşdırılması ilə bağlı müvafiq sənəd rəsmiləşdirilib.
Şəhər rəhbəri bildirib ki, yeni və müasir sənaye müəssisəsinin inşası Mingəçevirdə yüzlərlə yeni iş yerinin yaradılmasına imkan verəcək. O, bu layihəni dövlət başçısının Mingəçevirə və şəhər sakinlərinə göstərdiyi diqqətin növbəti nümunəsi kimi dəyərləndirib.
Daha sonra şəhərdə həyata keçirilən abadlıq-quruculuq işlərindən danışan İ.İsmayılov təsdiq edilmiş tədbirlər planına uyğun olaraq Mingəçevirdə nümunəvi şəraitin yaradılması istiqamətində işlərin davam etdirildiyini bildirib.
Görüş zamanı sakinlər şəhərdə görülən işlərdən razılıqlarını ifadə edib, Azərbaycan Respublikasının Prezidentinə minnətdarlıqlarını çatdırıblar. Bununla yanaşı, müxtəlif sosial və məişət problemləri ilə bağlı müraciətlərini şəhər rəhbərinin diqqətinə çatdırıblar.
Sakinlərin müraciətlərini və aidiyyəti idarə və müəssisə rəhbərlərinin məlumatlarını dinləyən İlham İsmayılov səsləndirilən məsələlərin araşdırılaraq həllinin təmin olunması ilə bağlı konkret tapşırıqlar verib.
İcra başçısı hər bir məsələyə və vəzifəyə məsuliyyətlə yanaşılmasının, vətəndaş müraciətlərinin diqqətlə araşdırılmasının və sakinlərin məmnunluğunun təmin edilməsinin vacibliyini vurğulayıb.
Esmira Hidayətova, Mingəçevir
