Bunu elm və təhsil naziri Emin Əmrullayev İctimai TV-yə müsahibəsində bildirib.

Nazirin sözlərinə görə, hazırda ali təhsil müəssisələrində təxminən 60 min yer olduğu halda, tələbə olmaq üçün 90 min nəfər sənəd verir. Bu səbəbdən imtahanların çətin və ya asan olmasından asılı olmayaraq, müraciət edənlərin hamısının ali məktəbə qəbul olunması mümkün deyil:

“Çox sadədir: 60 min yerimiz var, 90 min nəfər sənəd verir. Həmişə 60 min nəfər tələbə adını alacaq, 30 min nəfər isə ala bilməyəcək. Qəbul imtahanı asan da olsa, çətin də olsa, nəticə dəyişmir”.

E.Əmrullayev qeyd edib ki, ali məktəbə qəbul uğrunda yaranan sərt rəqabət şagird və valideynlər üzərində ciddi təzyiq yaradır, eyni zamanda məktəb təhsilini dar çərçivəyə salır.

Nazir əvvəlki illərlə müqayisədə ali məktəblərdə plan yerlərinin iki dəfə artdığını da vurğulayıb:

“Əvvəllər 30 min nəfər qəbul olunur, 60 min nəfər kənarda qalırdı. İndi isə vəziyyət əksinədir. Amma 90 min nəfər 60 min yer uğrunda mübarizə aparırsa, sonda 30 min nəfər istəyinə çatmayacaq”.

Emin Əmrullayev bildirib ki, tam orta təhsil üzrə tətbiq edilən təmayül modelinin məqsədlərindən biri ali məktəbə hazırlaşan şagirdlər üçün dövlət hesabına daha bərabər və keyfiyyətli imkanlar yaratmaqdır.