Açılış mərasimində iqlim qərarlarının praktiki icrası, beynəlxalq əməkdaşlıq və COP31 ərəfəsində iqlim fəaliyyətinin gücləndirilməsi müzakirə ediləcək.
Açılış mərasimində Azərbaycanın xarici işlər naziri Ceyhun Bayramov, BMT-nin İqlim Dəyişikliyi üzrə Çərçivə Konvensiyasının icraçı katibi Saymon Stil, COP31-in icraçı direktoru Fatma Varank və digər rəsmi şəxslər çıxış edəcək.
***
10.25
“Bakı İqlim Fəaliyyəti Həftəsi 2026 (BCAW 2026)”nın üçüncü günü start götürüb.
Ölkə.az xəbər verir ki, üçüncü günün proqramında iqlim öhdəliklərindən konkret fəaliyyətə keçid, iqlim maliyyələşdirilməsi, gənclərin iqlim proseslərində iştirakı, süni intellekt və iqlim texnologiyaları, enerji səmərəliliyi, metan emissiyalarının azaldılması, su ehtiyatlarının idarə olunması və mədəni irsin qorunması kimi məsələlər əsas diqqət mərkəzindədir.
Günün ilk sessiyalarından biri “COP31-dən sonra: tərəfdaşlıq vasitəsilə öhdəliklərin icrasının təmin edilməsi” mövzusuna həsr olunub. Dəyirmi masa çərçivəsində COP31-dən sonra qəbul ediləcək iqlim öhdəliklərinin praktiki nəticələrə çevrilməsi və bu istiqamətdə tərəfdaşlığın rolu müzakirə ediləcək.
Proqramda submilli qurumların iqlim fəaliyyətində roluna dair “Impact Dialogue” sessiyası da yer alıb. Burada yerli və regional səviyyədə iqlim siyasətinin həyata keçirilməsi və bu qurumların iqlim fəaliyyətinə töhfəsi müzakirə olunacaq.
Üçüncü günün proqramında gənc jurnalistlərin iqlim mövzusunda fəaliyyətinə həsr olunan “Climate conversations: Engaging Young Journalists” dəyirmi masası da keçiriləcək. Sessiyada gənc jurnalistlərin iqlim gündəliyinin işıqlandırılmasında rolu və onların bu sahədə fəallığının artırılması məsələləri nəzərdən keçiriləcək.
Bununla yanaşı, binaların enerji səmərəliliyinin sertifikatlaşdırılması və rəqəmsal bina pasportları mövzusunda müzakirələr aparılacaq. Bu sessiyada tikinti sektorunda enerji səmərəliliyinin artırılması, rəqəmsal həllərin tətbiqi və binaların iqlim məqsədlərinə uyğunlaşdırılması məsələləri diqqət mərkəzindədir.
Günün proqramında gənclərin rəhbərliyi ilə keçirilən İqlim Forumu çərçivəsində də müzakirələr nəzərdə tutulub. “Öhdəliklərdən icraya: COP31-ə gedən yolda” mövzusunda sessiyada iqlim öhdəliklərinin real fəaliyyətə çevrilməsi yolları müzakirə ediləcək. Digər sessiyada isə “İqlim × Süni intellekt: Texnologiya iqlim böhranını həll edə bilərmi?” sualı ətrafında fikir mübadiləsi aparılacaq.
Üçüncü günün digər mühüm mövzularından biri sülh, yardım və bərpa üçün dövlət və özəl iqlim maliyyəsinin səfərbər edilməsidir. Sessiyada iqlim maliyyəsinin müxtəlif ehtiyacların qarşılanmasına yönəldilməsi və dövlət-özəl sektor əməkdaşlığının imkanları nəzərdən keçiriləcək.
Həmçinin türk sivilizasiyasında mədəni irsin və biomüxtəlifliyin qorunması mövzusunda dəyirmi masa keçirilir. Sessiyada ortaq ənənələrdən birgə fəaliyyətə keçid, mədəni irsin iqlim dəyişmələrinin təsirlərindən qorunması və biomüxtəlifliyin mühafizəsi məsələləri müzakirə olunacaq.
Proqram çərçivəsində iqlimədavamlı texnologiyalar və innovasiyaların sürətləndirilməsi mövzusunda da müzakirə aparılacaq. Burada iqlim dəyişmələrinin təsirlərinə davamlı gələcəyin formalaşdırılmasında yeni texnologiyaların və innovativ həllərin rolu diqqət mərkəzindədir.
Günün ikinci yarısında Xəzər regionunda metan emissiyalarının azaldılmasının genişləndirilməsi mövzusunda dəyirmi masa keçiriləcək. Sessiyada metan emissiyalarının azaldılması, regional əməkdaşlıq və bu istiqamətdə konkret fəaliyyətlərin genişləndirilməsi məsələləri müzakirə olunacaq.
Üçüncü günün proqramının əsas sessiyalarından biri də “İqlim fəaliyyəti üçün Bakı Su Dialoqu – öhdəliklərdən icraya” mövzusundadır. Sessiyada COP31-ə qədər su mərkəzli iqlim fəaliyyətinin inkişaf etdirilməsi, su ehtiyatlarının iqlim dəyişmələrinə uyğun idarə olunması və qəbul edilmiş öhdəliklərin praktik tədbirlərə çevrilməsi məsələləri gündəmdə olacaq.
Bakı İqlim Fəaliyyəti Həftəsi (BCAW 2026) sentyabrın 11-dək davam edəcək.
