Bunu açıqlamasında Milli Məclisin deputatı Kamran Bayramov deyib.
O bildirib ki, 2020-ci il noyabrın 8-də Şuşanın azad edilməsi ilə Azərbaycan tarixinin yeni səhifəsi yazıldı: “Əslində, həmin gün təkcə bir şəhərin deyil, bütöv bir xalqın taleyində dönüş baş verdi. Şuşa üzərində dalğalanan üçrəngli bayraq Azərbaycanın hərbi qələbəsinin, siyasi iradəsinin və dövlətçilik qüdrətinin rəmzinə çevrildi. Otuz il ərzində işğal faktı ilə barışmağa məcbur edilmək istənilən Azərbaycan həmin gün öz taleyinin sahibi olduğunu bütün dünyaya nümayiş etdirdi.
Lakin 8 Noyabrın əhəmiyyəti yalnız hərbi və tarixi müstəvi ilə məhdudlaşmır. Bu qələbənin ən mühüm nəticələrindən biri Azərbaycanın regional və qlobal siyasi proseslərdə rolunun keyfiyyətcə dəyişməsidir. Bakı artıq yalnız öz təhlükəsizliyini təmin etməyə çalışan, beynəlxalq platformalarda milli maraqlarını müdafiə edən dövlət deyil. Azərbaycan bu gün regionun gələcəyinə dair qərarların formalaşmasında iştirak edən, yeni kommunikasiya xətlərinin, iqtisadi əməkdaşlıq platformalarının və geosiyasi təşəbbüslərin mərkəzində dayanan mühüm aktordur”.
Kamran Bayramov hesab edir ki, Azərbaycanın hərbi qələbəsi bu köhnə geosiyasi konstruksiyanı dağıtdı: “Regionda yeni reallıq yarandı və həmin reallığın əsas müəlliflərindən biri məhz Bakı oldu. Prezident İlham Əliyevin rəhbərliyi ilə həyata keçirilən çoxvektorlu və balanslaşdırılmış xarici siyasət Azərbaycanın bu yeni mərhələdə manevr imkanlarını genişləndirdi. Bakı Ankara ilə strateji müttəfiqliyini möhkəmləndirməklə yanaşı, Moskva, Vaşinqton, Pekin, Brüssel və Mərkəzi Asiya paytaxtları ilə münasibətlərdə milli maraqlara əsaslanan praqmatik xətt yürüdür.
Bu siyasətin mahiyyəti sadə, lakin stratejidir: Azərbaycan heç bir geosiyasi mərkəzin maraqlarının alətinə çevrilmədən müxtəlif güc mərkəzləri ilə əməkdaşlıq edir, öz suveren qərarvermə imkanlarını qoruyur və regional proseslərdə müstəqil mövqeyini saxlayır. Məhz bu yanaşma Bakının beynəlxalq siyasi çəkisini artıran əsas amillərdəndir.
Bu gün Azərbaycanın geosiyasi əhəmiyyətini müəyyənləşdirən əsas amillərdən biri onun unikal coğrafi mövqeyi və bu mövqeyi real iqtisadi-siyasi üstünlüyə çevirmək bacarığıdır. Şərqlə Qərbin, Şimalla Cənubun kəsişməsində yerləşən Azərbaycan artıq sadəcə tranzit ölkə kimi qiymətləndirilə bilməz. Bakı Mərkəzi Asiya ilə Avropanı, Türkiyə ilə Xəzər hövzəsini, Şimal-Cənub və Şərq-Qərb nəqliyyat marşrutlarını birləşdirən strateji qovşaq rolunu gücləndirir. Orta Dəhlizin artan əhəmiyyəti, Xəzər üzərindən daşımaların genişlənməsi, Azərbaycanın enerji təhlükəsizliyində oynadığı rol və yeni nəqliyyat-kommunikasiya layihələri ölkəmizin geosiyasi çəkisini daha da artırır.
Zəngəzur dəhlizi və TRIPP layihəsi ətrafında formalaşan gündəlik isə Azərbaycanın regional baxışının daha geniş miqyasını ortaya qoyur. Bu təşəbbüslər yalnız Azərbaycanı Naxçıvanla birləşdirmək məsələsi deyil. Söhbət Türkiyədən Mərkəzi Asiyaya, oradan daha geniş Avrasiya məkanına uzanan yeni iqtisadi və logistika imkanlarından gedir.
Beləliklə, Azərbaycan coğrafiyasının yaratdığı üstünlüyü geosiyasi təsir imkanına çevirir. Bir vaxtlar münaqişənin yaratdığı məhdudiyyətlər səbəbindən reallaşa bilməyən regional əməkdaşlıq perspektivləri indi yeni siyasi və iqtisadi gündəliyin əsas istiqamətlərindən birinə çevrilir”.
Deputatın fikrincə, 8 Noyabrın Azərbaycan xalqına və dövlətinə verdiyi ən böyük dərs budur ki, tarix qarşısında passiv mövqe tutanlar başqalarının yazdığı ssenarilərin iştirakçısına çevrilirlər: “Öz taleyinə sahib çıxanlar isə tarixin müəllifləri olurlar. Bu baxımdan 8 Noyabr Azərbaycanın sadəcə torpaqlarını deyil, tarixi iddiasını, siyasi iradəsini və gələcək hədəflərini də geri qaytardığı gündür. Odur ki, Şuşadan başlanan Zəfər yolu bu gün Avrasiyanın geosiyasi xəritəsində yeni istiqamətlər açır. Çünki Zəfərin ən böyük mənası yalnız qalib gəlmək deyil, qələbədən sonra yeni tarix yazmaq, yeni reallıq yaratmaq və gələcəyin siyasi arxitekturasında özünə layiqli yer tutmaqdır. 8 Noyabr isə bu tarixin başlanğıcıdır”.
