Bu barədə Financial Times qəzeti yazıb.
“Bu obyektlər, xüsusilə də böyük hərbi bazalar çox həssasdır. ABŞ hərbi qüvvələrinin Fars körfəzindən yenidən bölüşdürülməsinin şahidi olacağıq. Hərbi qüvvələrin yenidən yerləşdirilməsi qısa mənzilli raketlərin və pilotsuz uçuş aparatlarının çatma məsafəsində yerləşən bazalardan həyata keçiriləcək”, – materialda qeyd olunub.
Müharibənin altı ayı ərzində İran qısa mənzilli raketlər və pilotsuz uçuş aparatları ilə ABŞ-ın obyektlərinə zərbələr endirib. Nəticədə təyyarə anqarları, təchizat infrastrukturu, radar sistemləri, eləcə də komanda məntəqələri vurulub. İndi Vaşinqton qarşısında zədələnmiş obyektlərin bərpa edilib-edilməməsi və ya regiondakı hərbi mövcudluğuna yenidən baxılması məsələsi dayanır.
Nəşrin məlumatına görə, Amerika Sahibkarlıq İnstitutu (AEI) aprel ayında Yaxın Şərqin yeddi ölkəsində yerləşən 11 ABŞ hərbi bazasına dəymiş ziyanın bərpasının dəyərini təxminən 5 milyard dollar qiymətləndirib. Bununla belə, Pentaqon bu xərcləri İranla müharibənin dəyərinə dair öz hesablamalarına daxil etməyib.
Xatırladaq ki, daha əvvəl İran Milli Təhlükəsizlik Ali Şurasının katibi Möhsün Rzayi Fars körfəzi ölkələrini ABŞ-ın sanksiyalarına qoşulmağın nəticələri barədə xəbərdar edib. Onun sözlərinə görə, belə bir halda Tehran təkcə Hörmüz boğazındakı neft tankerlərinə deyil, neft ixracının alternativ marşrutlarına da zərbələr endirməyə hazırdır.
