Nazir bu barədə “Xankəndi” – “Karvan-Yevlax” matçının fasiləsində jurnalistlərə açıqlamasında bildirib.
“Xatırlayırsıса, “Xankəndi” azad olunduqda, 2023-cü il dekabrın 21-də burada ilk oyun baş tutdu. “Qarabağ” MOİK-lə qarşılaşdı. Ondan sonra ölkə başçısının tapşırıqlarına əsasən, stadion yenidən quruldu. Bu yaxınlarda yenidən ölkə başçısının iştirakı ilə stadionun açılışı baş tutdu. “Xankəndi” ilk oyununu keçirir evdə.
Təbii ki, çox sevindirici haldır. Çox sayda azarkeş var. Çoxdandır ki, gözlədiyimiz gün idi. MOİK də burada oynamaq qərarına gəlib. Növbəti ildən onlar da oyunlarını burada keçirəcək. Stadion UEFA kateqoriyasiyanı almaq üçün hazırdır. Beynəlxalq standartlar üçün burada hər cür şərait yaradılıb. AFFA-dan da asılıdır, yaxın gələcəkdə çalışacağıq ki, milli komanda ev oyununu burada keçirsin”.
Nazir Xankəndidə həyata keçiriləcək növbəti layihələrdən də danışıb.
“Həm bizim nazirliyin, həm də təhsil nazirliyinin uşaq gənclər idman məktəbləri var. Orada futbol bölmələri də var. MOİK və digər idman klubları da var. Bu, dövlətin uşaq futboluna olan dəstəyidir. Bununla yanaşı, bütün futbol klublarının futbol akademiyaları var. Orada da inkişaf var, təbliğat yaxşı gedir, U-15 dünya çempionatı ilk olaraq bizim ölkəmizdə keçirildi. Nəticələri də görəcəyik”.
F. Qayıbov UEFA-nın Xankəndi Şəhər Stadionuna lisenziya verəcəyi ilə bağlı da danışıb.
“Hazırda məndə belə məlumat yoxdur. Amma dediyim kimi, bu stadion beynəlxalq standartlara uyğundur. Gözləyirik ki, UEFA-dan gəlib kateqoriya verilsin. Ondan sonra nəinki aşağı yaş qruplarından ibarət yığmalar, hətta A milli komandamız da burada oynaya bilər. Hətta burada avrokubok matçları da keçirilə bilər”.