“Bakıda tanınmış iş adamının həyat yoldaşı, Türkiyə vətəndaşı Burcu Butayeva və onun bacısı Burçin Kayaş tərəfindən mən və assistentim şiddətə məruz qalmışıq”.
Bu şikayətlə “Qafqazinfo”ya həkim- kosmetoloq Aynur Süleymanova müraciət edib.
Həkimin sözlərinə görə, adıçəkilən xanımlar onun işlədiyi klinikaya prosedur etdirmək üçün gəliblər. A.Süleymanova deyir ki, xoş olmayan rəftarlarına görə onlara prosedur etmək istəməyib və otağı tərk etmələrini istədiyini bildirəndə mübahisə yaranıb: “Burcu Butayeva mənim daimi pasiyentim olub. Bacısı Burçin Kayaş isə bir il öncə mənim yanımda olub və müəyyən bir prosedur etdirib, daha sonra isə Türkiyəyə gedib. Gedərkən də prosedurdan çox razı qaldığını bildirmişdi. Lakin gedəndən sonra şiş olduğunu deyərək yenidən müraciət etmişdi və ona bildirmişdim ki, bu təbii haldır, narahatlığı varsa müayinə üçün klinikaya da gələ bilər. Lakin gəlmədi və sonradan müraciət də etmədi. Aprelin 21-də hər iki xanım yenidən klinikamıza gəldi. Xanım digər bir prosedur üçün müraciət etmişdi. Bu zaman dedi ki, bir il əvvəl etdiyi posedurdan razı deyil, ya pulunu qaytarım, ya da yenidən eyni proseduru edim. Mən də dedim ki, belə bir şey ola bilməz. Ona görə ki, həm tam normaldır, həm də artıq bir il ötüb, problem, ya da narazılq olsaydı, prosedurdan bir ay sonra müraciət edə bilərdi. Dedi ki, mən Türkiyədə idim, gələ bilmədim. Bununla da arada mübahisə başladı. Mən bildirdim ki, artıq heç bir prosedur edə bilmərəm, şikayətləri üçün klinikanın baş həkiminə müraciət etsinlər. Bundan sonra xanım səs-küy salaraq “Sən bilirsən mən kiməm? Mənimlə belə rəftar edə bilməzsən!”,- dedi”.
A.Süleymanova bildirir ki, məsələ sadəcə mübahisə ilə qalmayıb, pasiyent əl-qol hərəkətlərinə də keçib: “Baxili çıxardıb üzərimə atdı. Daha sonra isə assistentim Aynur Atakişiyevanın üz nahiyəsinə əli ilə zərbə vurdu. Əlimizdə bütün bunları əks etdirən görüntülər də var. Burcu Butayevanın həyat yoldaşı isə dəfələrlə müdiriyyətə müraciət etdi və hədiyyələr vermək istədi, üzr istədi ki, ərizəmi geri götürüm. Mənim tək istəyim o oldu ki, bu xanımlar növbədə duran pasiyentlərimin qarşısında necə ki, bu söz-söhbəti salmışdılar, eləcə də gəlib üzr istəsinlər. Heç olmasa, assistentimdən üzr istəsinlər. Lakin bunu etmədilər”.
Kosmetoloqun sözlərinə görə, hadisə baş verən gün polisə də müraciət ediblər: “Onlar da bizdən sonra polisə müraciət ediblər ki, guya onları vurmuşuq. Döyməklərinə, şər-böhtan ataraq təhqir etməklərinə dair görüntü və ekspert rəyi olmağına baxmayaraq, Yasamal RPI 26-cı PB-nin təhqiqatçısı Qafarov Ramil əsassız qərar qəbul edib. Üstəlik, mənə və assistentimə cəza tətbiq edilib. Bir aydan çoxdur ki, hələ də bu xanımlar cəzasız qalıblar. Sadəcə Burcu Butayevaya cərimə cəzası veriblər. Digər xanım, Burçin Kayaş hadisədən sonra təcili şəkildə Türkiyəyə göndərildi. Dedilər ki, hamilədir. Amma klinikamıza prosedur olunmaq üçün gələndə imzaladığı sənəddə hamilə olmadığını bildirmişdi”.
Həkim Burcu Butayevanın hansı iş adamının xanımı olmasını açıqlamayıb.
Məsələ ilə bağlı Daxili İşlər Nazirliyinə sorğu ünvanladıq. Qurumun mətbuat xidmətinin əməkdaşı Nurlan Əliyev müraciətimizə cavab olaraq bildirildi ki, aprelin 21-də Aynur Süleymanovanın, Aynur Atakişiyevanın və Türkiyə Respublikasının vətəndaşı Burcu Butayevin döyülmələri barədə Yasamal RPİ-nin 26-cı Polis Bölməsinə müraciətləri daxil olub: “Müraciətlər əsasında polis bölməsində təhqiqat araşdırması başlanılıb. Araşdırmalarla müəyyən olunub ki, Butayev aprelin 21-də onun yanına bir neçə günlük qonaq gələn bacısı Türkiyə vətəndaşı Kayaş Burçin ilə birlikdə tanıdığı və əvvəllər ona kosmetik xidmətlər göstərən həkim-kosmetoloq Aynur Süleymanovanın işlədiyi klinikaya gəliblər. Kayaş Burçin həkimin iş otağında olarkən Süleymanovadan əvvəllər tərəfindən göstərilən keyfiyyətsiz xidmətlərə görə, kosmetik xidmətlərin ödənişsiz edilməsini xahiş edib. Lakin sonuncu ondan kobud şəkildə otağını tərk etməsini tələb edib. Butayev otaqdan çıxan zaman həkimin assistenti kimi fəaliyyət göstərən Aynur Atakişiyeva qapını üzərinə bağlayaraq qoluna xəsarət yetirib. Bu səbəbdən Butayev yenidən otağa daxil olaraq Atakişiyevanı itələyib. Nəticədə Süleymanova və Burçin münaqişəyə müdaxilə edərək bir-birilərinə xəsarətlər yetiriblər.
Xəsarətlərin dərəcəsini müəyyən etmək məqsədilə müvafiq ekspertiza təyin edilib. Ekspertizanın rəyinə əsasən hər 3 şikayətçinin xəsarətləri sağlamlığa zərər vurmayan xəsarətlər olduğundan dərəcələri təyin edilməyib.
Toplanmış material üzrə cinayət işinin başlanmasının rədd edilməsi və hər üç şəxs barəsində İnzibati Xətalar Məcəlləsinin 157-ci maddəsi ilə inzibati tənbeh tədbirlərinin görülməsi ilə bağlı qərar qəbul edilib”.
Qafqazinfo